LAOAG CITY – Agarup 100 nga indibidual ti nadertiminar a close contact ti nagpositibo iti UK Covid-19 Variant wenno ti B.1.1.7 variant ditoy probinsya.
Daytoy ti inpakaammo ni Dr. Norman Rabago, ti covid-19 consultant ditoy probinsya.
Segun ken ni rabago, dagiti nasao a close contact ket pakaibilanganen ti primary, secondary ken third generation a nakapulapol ti pasyente.
Mainaig iti daytoy, kuna na a naka-isolate iti quarantine facility ditoy probinysa ti pasyente idinto a dagiti primary ken secondry contact ket nagatalinaed iti barangay isolation unit ken naka-home quarantine dagiti tertiary contact.
Kabayatanna, inpakaamo ti covid-19 consultant a mismo a dagiti health workers ti nagturong iti isolation facilities dagiti contact tapno saanen a rumuar dagitoy a dumalan iti swab test.
Maipalagip a naggapo iti Bahrain ti pasyente a nagpositibo iti UK variant ken residente daytoy iti ili ti Pasuquin.
Immuna a nagpositibo iti covid-19 apaman a nakasangpet ditoy pagilyan ken dimmalan iti 14-day quarantine iti Metro manila sakbay a nagawid ditoy probinsya.
Kabayatanna, Pebrero 14 laeng idi naipruk-at ti resulta ti genome sequencing ti sample na nu sadino a positibo daytoy iti UK covid-19 variant.
