LAOAG CITY – Nauram ti maysa a pagtaengan iti Brgy. Barit ditoy siudad ti Laoag.
Segun kenni Mrs. Arlina Eugenio, nakita na ti pagtaengan da a maur-uram bayat ti panagawid na daytoy.
Inlawlawag na nga awan ti nakasaksak wenno naibati a nakasindi iti uneg ti pagtaengan idi pinanawan da daytoy.
Nupay kasta, inpakaammo dagiti nakakita ti insidente ket maysa kadagiti annak ni Eugenio a grade 2 ti nasapa a nagawid iti balay manipud iti pagadalan ngem rimwar met laeng daytoy.
Idi nakapanaw ti ubing ket ditan a nagrugi ti uram.
Kabayatanna, nagyaman ni Mrs. Eugenio nga awan ti nadangran kadakuada.
Mainaig iti daytoy, inpakaammo ni Fire Marshall Ronald Castillo iti BFP Laoag nga umabot ti agarup 100 a ribo a pisos ti inisyal a balur dagiti dimmapo.
Kuna na a possible a namunganay ti uram iti ngato ti pagtaengan a naaramid babaen kadagiti alisto a mauram a materyales.
Maituloy ti imbestigasyon ita nga aldaw.
