LAOAG CITY – Mabalin a sumurok-kumurang 12 a ribu a pagadalan ti maapektaran gapu iti iduduprak ti Super Typhoon Uwan ditoy pagilian basar iti Department of Education (DepEd) Disaster Risk Reduction and Management Service.
Iti kaudian nga inruarda a report ti Department of Education (DepEd) Disaster Risk Reduction and Management Service, posible a dumanon iti 11,968 a pagadalan manipud iti 120 a division ti mabalin a malayos idinto a 12,747 manipud iti 110 a division ti maapektaran ti landslide gapu iti napigsa a tudo gubuay ti bagyo.
Rumrummuar a ti Region 3 ti addaan ti kaaduan a pagadalan a mabalin a malayos nga addaan ti 2,936 a bilang ti pagadalan idinto a CALABARZON met ti addaan ti adu a bilang ti pagadalan a naapektaran ti landslide nga adda iti 2,786.
Pinalagipan ti ahensia nga agtultuloy ti pannakikoordinarda kadagiti lokal a gobierno ken Disaster Risk Reduction and Management offices tapno masigurado ti kinasagana iti emergency response ken i-activate ti School Disaster Risk Reduction Management Teams ken contigency plan para iti panaglayos, landslide, ken dalluyon.
Kabayatanna, pagan-annaden ti ahensa dagiti learning materials kadagiti pagadalan ken maipasagsagana dagiti emergency supplies ken resources.
