LAOAG CITY – Natay ti agarup 14 nga indibidual idinto 750 ti nasugatan gapu iti napigsa a panagbettak iti maysa a kadagiti key ports idiay Iran.
Napasamak ti panagbettak iti Shahid Rajaee ti maibilang a kadakkelan a commercial port nga asideg iti southern city ti Bandar Abbas.
Gapu iti daytoy, nadadael pay dagiti tawa ken bubungan dagiti asideg a pasdek pakairamanan dagiti luglugan.
Makita iti bidyu ti dumakdakkel nga apoy sakbay ti napigsa a panagbettak no sadinno nga adda dagiti sumagmamano a tattao ti agal-alisto nga umadayo manipud iti lugar ken adda pay dagiti nakadasay iti kalsada a nagsagaba ti sugat a napalikawkawan ti smoking debris.
Basar iti aerial footage, agawarwaras ti apoy manipud iti maysa a container agingga a mairamraman dagiti dadduma a container.
Naammoan a naibilin nga agserra pay laeng dagiti pagadalan ken opisina iti rehion.
Mainaig iti daytoy, dagiti naapektaran a containers ket naglaon ti solid fuel para iti ballistic missiles.
Kabayatanna, ti uram ket nagresulta iti improper handling ti shipment ti solid fuel a naikeddeng a mausar para iti Iranian ballistic missiles.
