LAOAG CITY – Umaboten iti 1,490 ti pakadagupan ti kaso ti COVID-19 iti intero nga Hawaii kalpasan a nakaimaldit ti Hawaii Department of Health ti 55 a baro a kaso ti nasao a virus.
Daytoy ti nakalap a report ni Bombo International News Correspondent Manny Pascua, aldaw ti Huebes iti nasao a lugar.
Kuna na a dagiti 55 a baro a kaso ket naartapan na ti 42 a naimaldit a kaso idi Hulyo 12 ita a tawen.
Segun kenni Pascua, 50 a baro a kaso ti COVID-19 ti naimaldit iti Honolulu, dua iti Maui ken tallo iti Big Island, Hawaii.
Manipud iti pakadagupan ti kaso ti COVID-19 ket 26 kadagitoy ti pimmusay.
Ti kaudian a pimmusay ket maysa a flight attendant kalpasan a nakipaset iti maysa a seminar ken ti maysa a nataengan.
Nagpalagip dagiti amin a mayor iti Hawaii ti panagisuot dagiti residente iti facemask no rumwar iti pagtaengan da.
