LAOAG CITY – Agtultuloy a manaynayonan dagiti pamilia a naapektaran ti Super Typhoon Nando.
Basar iti Department of Social Welfare and Development (DSWD), dumanon iti 158,571 nga indibidual wenno katukad ti 43,463 a pamilia ti naapektaran iti dakes a panawen.
Naammoan a dagiti naapektaran nga indibidual ket manipud iti Cordillera Administrative Region (CAR), Ilocos Region, Cagayan Valley, Bicol Region, Western Visayas ken Zamboanga Peninsula.
Iti kaudian a datos, dumanon iti 13,888 nga indibidual wenno katukad ti 4,564 a pamilia ti nagtalinaed kadagiti evacuation centers idinto a 3,775 a tattao wenno 1,608 a pamilia ti temporario a nakipagnaed iti kabagian wenno pagayamda.
Kabayatanna, dumanonen iti ₱4,687,543 ti humanitarian assistance a naipaay kadagiti residente a naapektaran ti bagyo.
Inpasingked ti Department of Social Welfare and Development nga umdas ti pundoda iti panangsungbat kadagiti kalamidad pakairamanan ti sumurok ₱554 milyon a quick response fund ken ₱2.6 bilyon para iti food ken non-food items.
