LAOAG CITY – Umaboten iti 180 a natataengan ti pinapatay ti maysa a miembro ti gang idiay Haitian capital, Port-au-Prince.
Segun iti National Human Rights Defence Network (RNDDH) tinarget ti local gang leader dagiti biktima apaman a nakapasar ti anak na ti nakaro a sakit ken pimmusay daytoy.
Basar iti imbestigasyon, naaramid ni Micanor “Mikanò” Altès ti krimen gapu ta inpagarup na a tinamay dagiti biktima ti anak na.
Inlawlawag ni Mikano kadagiti otoridad a nagkonsulta isuna iti maysa a voodoo priest ket ditoy a binabalaw ti padi dagiti natataengan a mannamay.
Mainaig iti daytoy, inbatad ti United Nations nga umaboten iti lima a ribu nga indibidual ti napapatay idiay Haiti iti uneg laeng ti makatawen gapu iti gang violence.
