LAOAG CITY – Inbatad ni Brgy. Kagawad Jay-Z Lagundino iti Brgy. Pancian iti ili ti Pagudpud a naminpinsanen a saan a madalanan ti kalasada a paset ti Sitio Banquero iti nasao a barangay.
Kuna na a babaen iti patta-patta na ket agarup 200 a metro a kalawa ti kalsada ti nagaburan ti daga a naggedday manipod iti bantay ken agingga iti 20 kadapan ti kangato na.
Gapu iti daytoy, inpakaammo ni Lagundino a naruay a motorista dagiti na-stranded.
Kabayatanna, inbatad na a dagiti agkaligum a lumasat iti kalsada ket nagaramat ti bangka ken agtuloy dagitoy kadagiti nasken a turungen da.
Nu pay kasta, kuna na a temporaryo a naiparit ti panagbiyahe dagiti bangka gapu ta daytoy ti mandar ti Philippine Coast Guard.
Immuna iti daytoy, inpakaammo ni Lagundino nga awan met dagiti nairekord a nadangran gapu iti nasao nga isident sipud idi kalman nga isu ti panangrugi ti panaggedday ti daga.
