LAOAG CITY – Kinumpirmaran ni Dr. Robert Pungtilan, ti city veterinarian iti siudad ti Batac nga umabot iti 250 a baboy ti maisakripisyo iti Brgy. Tabug iti nasao a siudad.
Segun kenkuana, addan ti 200 a baboy ti immuna a naikali ken manamnama a maileppas ti nabatbati a 50 ita nga aldaw.
Inbatad na a kangrunaan a naggapoan dagiti naisakripisyo a baboy ket iti Sitio Surgi ken Nagbaksan nga isu ti lugar dagiti 12 a baboy a positibo iti ASF.
Mainaig iti daytoy, kuna ni Pungtilan nga umabot iti 50 nga hog raisers ti apektado.
Naamoan nga iti maysa a turod ti national tobacco admistration ti pakaikalian dagiti baboy ken aguneg ti tallo a metro.
Kabayatanna, kuna ti city Veterinarian nga adda pay ti naalaan ti sample iti dadduma a sitio iti Brgy. Tabug kalpasan nga adda dagiti natay ken agsaksakit a baboy.
Innayun ni Pungtilan nga agtultuloy ti panagimbestigarda seknan iti naggapuan ti ASF virus a nakaapektar iti nasao a barangay.
