LAOAG CITY – Agarup 2,500 a trabahador a Pilipino ti mabenepisiaran iti operasion ti Saint Baker GIGA Factory a nainaguraran idiay Capas, Tarlac nga idauluan ni Presidente Ferdinand R. Marcos Jr.
Pagaammo daytoy a kompania nga agaramid kadagiti Lithium Iron Phosphate (LFP) a bateria a pagaammo a natalged, episiente, ken napaut ti panagbiagda.
Daytoy ti umuna a kompania iti Pilipanas nga agararamid kadagiti Lithium Iron Phosphate battery, a makatulong kadagiti addang nga inaramid ti Marcos Administration nga agturong iti panggepna a maragpat ti renewable energy goals ti pagilian.
Mainaig iti daytoy, ti inisial a produksion ti kompania ket manamnama a 300 megawatt-hours, wenno katukag ti 6,000 a electric vehicle batters wenno 60,000 nga home battery system.
Iti tawen 2030, manamnama ti naan-anay a kapasidad ti produksion ti kompania ket dumanon iti dua a gigawatt-oras iti kada tawen.
Manamnama nga agarup P5 billion ti pamastrekan ti kompania iti kada tawen iti lokal nga ekonomia, manipud iti negosio, supplier ken partners ti kompania a mabenepisiaran met iti operasion.
