LAOAG CITY – Manamnama a dumanon iti sumurok-kumurang 27 a milyon nga estudiante manipud iti preschool agingga iti senior high school ti ag-enroll para iti School Year 2025–2026 basar iti Department of Education.
Inbatad ni Assistant Secretary Jocelyn Andaya, agtultuloy a solsolbaren ti departamento ti kinakurang dagiti klasrum iti baet ti panagadu dagiti estudiante.
Naammoan nga agkasapulan ti 165 a ribu a klasrum iti pampubliko a sistema ti edukasion a gagem a solbaren ti Department of Education iti babaen ti public-private partnerships.
Kabayatanna, mangisayangkat met ti Department of Education ti Oplan Balik Eskwela pakairamanan ti Brigada Eskwela, manipud inton bigat, Hunio 9 agingga iti Hunio 13.
Makatulong ti programa tapno mapasayaat ti kasasaad dagiti klasrum.
Kinumpirmaran ni Andaya nga adda dagiti nadadael a lamisaan ken tugaw banag nga ikagkagumaanda ti pannakatarimaan wenno pannakasukat kadagitoy.
