LAOAG CITY – Maipadalan iti culling operation wenno pannakaisakripisio ti agarup 300 a baboy iti maysa a piggery farm iti Barangay Alejo Malasig iti ili ti Vintar.
Segun ken ni Barangay Chairman Claudio Agcaoili iti nasao a barangay, daytoy ket kalpasan nga adda ti nagpositibo a baboy iti African Swine Fever wenno ASF virus.
Gapu iti daytoy, kunana nga insigida nga adda ti naiwayat a panagtataripnong kaduana dagiti maseknan nga indibidual ken opisina tapno saanen nga agwaras ti nasao a virus.
Inlawlawagna nga adda ti naipatulod a blood sample manipod kadagiti dadduma pay a baboy ngem maiyur-uray pay laeng ti resulta daytoy.
Inbatadna a mangrugi ita nga aldaw ket adda ti naiestablisar nga ASF Checkpoint tapno mapaigetan ti panagbantayda.
Innayonna a naiget pay laeng a maipawil a mairuar dagiti taraken a baboy iti uneg ti barangayda tapno maipasigurado nga awanen ti maapektaran pay iti African Swine Fever virus.
