LAOAG CITY – Napukawan iti suplay ti kuriente ti agarup 300 a ribu a residente idiay Estados Unidos gapu iti snow storm.
Segun ken ni Bombo International News Correspondent Rene Ballenas manipud idiay Estados Unidos, adda ti pito nga estado ti Amerika ti makapaspasar ti nakaro nga snow storm kas ti Virginia, Kentucky, Indiana, West Virginia, Maryland, Washington D.C at Illinois.
Inbatadna a dumanon iti 10 agingga 12 a pulgada ti kapuskol ti niebe ti mapaspasaran ita dagiti nadakamat nga estado no sadinno ket bumabbaba pay ti marikrikna a temperatura.
Inlawlawagna a sumurok-kumurang nga 60 a milyon nga Amerikano ti maap-apektaran iti snow storm ken adda dagiti sumagmamano nga indibidual ti natay gapu iti daytoy.
Kunana a nakanselar ti dua a ribu a flight idiay Estados Unidos, pakairamanan dagiti serrek iti pagadalan iti Philadelphia, Baltimore ken Washington D.C.
Innayonna nga adda pay dagiti sumagmamano nga estado ti nangideklara ti state of emergency.
Kabayatanna, immunan a nagballaag ti National Weather Service (NWS) kadagiti residente gapu ta posible nga agbayag pay ti snow storm idiay Estados Unidos.
