LAOAG CITY – Napalaos ti pungtot dagiti sumagmamano nga OFW idiay Hongkong kalpasan a naduktalan da a ti ginatang da a ticket nga agawid koma ditoy Pilipinas ket saan da a mausar.
Daytoy ket gapu ta maipagarop a saan a binayadan ti Peya Travel Agency iti Philippine Airlines dagiti ticket a ginatang ti agarop 300 nga OFW idiay Hongkong a naituding koma nga agawid ditoy pagilyan tapno makadenna da ti pamilya da ita a paskua.
Segun ken ni Gisele Derecho, OFW idiay Hongkong ken maysa kadagiti nagbalin a biktima ti nasao nga ahensya, inpakaammo kadakuada ti PAL nga inpa-book laeng ti Peya Travel Agency ti ginatang da a ticket ngem saan da a binayadan.
Inbatad ni Derecho a nagturong da ti nasaonga ahensya tapno pai-refund da ti inbayad da a ticket ngem rumrumuar nga awan ti pondo na isut gapu na nga awan ti maibayad na kadakuada.
Kabayatanna, kinumpirmaran ni Leny Hernando a taga Marcos, Ilocos Norte ngem agdama nga agtrab-trabaho idiay Hongkong a naituding koma nga agawid intono sabado ngem gapu ti napasamak ket naipospun ti flight na.
Inpetteng na a gapu ti panangloko kadakuada ti nasao nga ahensya ket saannan a makadenna ti pamilya na intono paskua.