LAOAG CITY – Dumanon iti 35 agingga 39 ti mairekrekord a ginggined iti kada aldaw ditoy pagilian sipod idi Disiembre 17 iti napalabas a tawen.
Segun ken ni Mr. Lawrence Mina, Regional Director ti Office of Civil Defense ti rehion uno, daytoy ti maysa kadagiti naiget nga imonmonitorda ditoy rehion ken iti intero a pagilian.
Inbatadna a masapol nga agbalin nga alerto iti amin a gundaway tapno maliklikan ti aniaman nga insidente nangruna ket saan a mapakpakadaan ti isasangbay ti ginggined.
Inlawlawagna nga adda ti dua a senario ti Philippine Institute of Volcanology and Seismology no sadinno ti maysa ket mabalin nga adda ti mapasamak a ginggined ngem in-inot nga agsardeng idinto a ti maikadua ket ti posible nga adda ti napigsa a ginggined a mapasamak wenno ti maaw-awagan a “The Big One.”
Innayonna a kasapulan ti kanayon a panangrebyuda ti Action Plan tapno maammoan dagiti kangrunaan a rumbeng nga aramiden no adda ti ginggined wenno pangta ti tsunami.
