LAOAG CITY – Natay ti 38 nga indibidual kalpasan ti 7.7M a gingined ken dinosena nga aftershocks iti dayaen a paset ti Indonesia.
Mainaig iti daytoy, addaan pay ti Tsunami waves a nababbaba ngem 1 a metro wenno 3 feet ti nairekord iti sumagmamano a paset ti nasao a pagilian.
Segun ken ni Suharyanto, ti mangidaulo ti National Disaster Management Agency nga agarup 2,000 pay nga indibidual ti naibakwit iti nataltalged a lugar.
Immunan a naideklarar ti 20 nga indibidual ti pimmusay iti port ti siudad ti Maumere ken 6 ti nasugatan ken dua ti na-trap iti sirok ti rubble.
Ti Maumere ti kangrunaan a siudad iti Sikka Regency ti Flores Island iti dayaen a paset ti Indonesia.
Kabayatanna, kuna ni Suharyanto a naruay pay laeng nga indibidual ti agdama a nakaipupok kadagiti pasdek a naapektaran iti napigsa a gingined.
