LAOAG CITY – Nagballaag ti kangrunaan a medical society ditoy pagilian ti kumarkaro a kaso ti obesity ditoy Pilipinas a mangituntunda ti seryoso a pangta iti salun-at ti puso ken bato dagiti Pilipino.
Basar iti Philippine College of Endocrinology, Diabetes and Metabolism (PCEDM), mapatta-patta a 39.8% kadagiti adult a Pilipino ti obese idinto a 17.3% met ti overweight a mangisagmak kadakuada iti nangato a peggad kadagiti nagduduma a sakit.
Gapu iti daytoy, nagtipon ti puersa ti Philippine College of Endocrinology, Diabetes and Metabolism, Philippine Heart Association (PHA), Philippine Society of Nephrology (PSN) ken Philippine Association for the Study of Overweight and Obesity (PASOO) tapno paigetan ti kampania kontra iti obesity ken maliklikan ti nakaro a komplikasion iti salun-at.
Inlawlawag ni Elaine Cunanan a saan laeng a simple a lifestyle problem ti obesity no diket maysa a chronic disease nga adda ti pakainaiganna iti genetics, taraon ken aglawlaw.
Innayonna a no mabaybay-an ti obesity ket mabalin daytoy a mangitunda ti diabetes, hypertension ken chronic kidney disease a karaman kadagiti kangrunaan a rason ti pannakatay ditoy pagilian.
