LAOAG CITY – Nainayun dagiti 15 a kaso ti coronavirus disease 2019 wenno COVID-19 iti Hawaii idi Marso 21, 2020.
Iti report ni Bombo International News Correspondent Manny Pascua, umaboten ti 48 ti bilang ti kaso ti COVID-19 no sadino nga umabot iti 35 ti kaso iti Honolulu, pito iti Maui, ken agpada nga addaan ti tallo a kaso iti isla ti Kauai ken iti Big Island.
Kabayatanna, kuna ni Pascua a kiniddaw ti Hawaii Department of Health ti tulong ti media a punasenda iti panunot dagiti residente a dagiti turista ti nangidanun ti virus idiay Hawaii.
Inbatad ni Pascua a sumay-sayaat ti sitwasyon maysa a taga Hawaii a nagpositibo iti virus ken nakalugan iti Diamond Cruise a nagsanglad idiay Japan itay kallabes.
Segun kenni Pascua, nagsardeng iti panagawat dagiti dentista iti intero nga Hawaii kadagiti pasyente tapno idonar da dagiti gown, ken mask kadagiti dadakkel nga ospital gapu iti panagkurang ti suplay kadagiti nasao a banag.
Innayon na nga agtultuloy ti panagtrabaho dagiti health authorities kadagiti ospital ken home care iti Hawaii.
Nairekep dagiti parke nangruna ti Volcano National Park ken insingasing ti mayor iti Big Island ti panangipatungpal na ti lockdown.
