LAOAG CITY – Kinumpirmaran ni Barangay Kagawad Eric Arenas iti Barangay Pancian iti ili ti Pagudpud nga ado dagiti nastranded aluglugan kalpasan ti panagreggaay ti daga.
Segun kenni Arenas, itay laeng agarop alas-otso itay bigat ket nagreggaay ti daga no sadinno ket tallo a back hoe ken maysa a payloader ti mangiwakwaknit iti daga.
Inlawlawag na a ti makitkita a rason ti panagreggaay ti daga manipud iti bantay ket ti manarimaan a road widening iti nadakamat a barangay iti laksid nga awan ti napasaran a tudo.
Kunana pay a nabakbak ti datin a nai-spray a semento iti bakras ti bantay gapo iti nasao a pannakaipalawa ti kalsada.
Gapo iti daytoy, ado a lugan dagiti saanen a napalubusan a makadalyasat gapo iti kinarisgo ti sitwasyon.
Innayon na a mapatta-patta nga 20-50 a metro ti kaatiddog ti kalsada a nagaburan ti daga.
