LAOAG CITY – Agarup 60 a ribo a pisos ti natakaw iti maysa a pagtaengan iti Brgy. 20 ditoy ciudad ti Laoag.
Nabigbig ti natakawan a ni Wilma Julian Cid, agtawen ti 71, naasawaan, librarian iti Bacarra Medical Center ken residente iti nasao a barangay.
Basar iti imbestigasyon, idi nakariing ti biktima ket naduktalan na a mapukpukaw iti agarup 50 ribo a pisos a brown wallet na, P2,500 a naipan iti pouch na ken natakaw pay dagiti alahas nga agbalor iti 5 ribo a pisos a naiparabaw iti lamisaan.
Mainaig iti dayta, naduktalan pay ti anak ti biktima a ni Jan Vincent Julian Cid, agtawen ti 38, naasawaan, time keeper iti maysa a construction, ken residente iti nasao a lugar a napukaw ti leather wallet na a naglaon ti dua a ribo a pisos a naipan iti TV rack.
Possible a simrek ti suspek iti main door ti pagtaengan.
Nadiskubre dagiti kameng ti SOCO ti maysa a gloves a naipan iti masetas ket ditoy a nakaala da iti latent print ti maipagarup a suspek manipod iti water PVC pipe.
Iti agdama, agtultuloy ti naun-uneg nga imbestigasyon dagiti otoridad iti nasao nga insidente.
