LAOAG CITY – Inpakaammo ni Bombo International News Correspondent Mrs. Pevelyn Fernandez, Ontario, Canada, nga umaboten ti agarup siam a ribo dagiti kaso ti coronavirus iti lugar da.
Kuna na nga agarup kagudua manipud iti bilang ti kaso ti COVID-19 dagiti nalaingan.
Dagiti nataengan dagiti kangrunaan a naapektaran ti nasao a virus.
Inbatad ni Fernandez nga umabot ti lima nga aldaw sakbay a maiparuk-at ti resulta dagiti maidalan iti COVID-19 testing.
Nupay kasta, adda ti maiwayat nga evaluation kadagiti tattao a makarikna ti saan a nakaro a sakit.
Segun kenni Fernandez, nataydagiti dua a pasyente gapu ti COVID-19 a nagtalinaed iti Intensive Care Unit a masarakan iti lugar da.
Kuna na a nadamag na laeng a pimmusay ti uliteg na ken atapen da a naala na ti virus iti ospital nga adda iti asideg da.
Inrakurak ni Fernandez nga adda ti agarup 900 nga health care professional dagiti nagpositibo ti coronavirus iti laeng probinsya ti Ontario.
Kuna na a manipud iti agarup siam a ribo a kaso ti COVID-19 ket agarup 900 dagiti health care professionals idinto a saan na pay a naamuan no adda dagiti doktor a karaman kadagiti nagpositibo ti nasao a virus.
Kabayatanna, inbatad ni Fernanadez mapatawan met ti multa dagiti agsalungasing ti panglintengan ti 750 a canadian dollar agingga iti 1,000 a canadian dollar.
Innayon na a natudio dagiti tattao seknan iti social distancing gapu ta uray awanen ti pulis nga agbantay ket naiget a sursuruten da ti nasao a pagalagadan.
Adda met ti makaumanay a suplay dagiti produkto kadagiti groceries ngem adda dagiti produkto a nalimitaran ti bilang ti mabalin a magatang.
Inpakaammo ni Fernandez nga adda ti Canada Emergency Response Benefits manipud iti gobyerno ngem adda dagiti criteria tapno maipaayan ti tulong.
Innayon na a ti kangrunaan a maikkan ti nasao a benepisyo ket para kadagiti permanent resident, ken dagiti agtrabtrabaho ken mabalin ti agaplikar iti kada bulan iti las-od ti uppat a bulan.
