LAOAG CITY – Agarup iti 16 a milyon a pisos a balor ti baka ti naibunong kadagiti 261 a benepisiario a mannalon ditoy probinsia.
Napili dagiti umawat basar iti kiddaw ti indibidual wenno grupo a naiturong iti “Agri Ka Dito” hotline ti gobierno probinsial.
Ti programa a panagibunong iti baka ket mapundoan babaen ti bingay ti probinsia iti excise tax ti tabako.
Mainaig iti daytoy iti panagbitla ni Gov. Matthew Marcos Manotoc, kunana a nasayaat a pamastrekan ti panagtaraken ti baka.
Inbatadna a kadagiti agtarigagay a maaddaan ti maysa a baka ket kiddawenda ti aniaman a kasapulan iti agrikultura ken aramidenda amin ti kabaelanda tapno matulungan dagiti mannalon ditoy probinsia.
Maipalagip a nairugi idi 2022 ti programa nga “Agri Ka Dito” ket maysa a flagship program ti gobierno probinsial a panggepna a tulongan dagiti mannalon ken mangngalap iti baet ti panagngato ti gastos iti agriculture inputs.
Immuna iti daytoy, nangisayangkat ti Provincial Veterinary Office iti basic livestock raising skills training para kadagiti benepisiario.
Kabayatanna, apaman nga aganak dagiti baka, masapul nga isubli dagiti benepisiario ti sumagmamano iti probinsia tapno maited iti sumaruno a benepisiario.
