LAOAG CITY – Umabot iti 1.2 million a pisos ti balor dagiti nadadael iti pannakauram ti maysa a pagtaengan iti Brgy. Puzol iti ili ti Pinili.
Daytoy ti inpakaammo ni Senior Fire Office Reymundo Atud, ti chief operation team leader iti Bureau of Fire Protection iti nasao nga ili.
Kuna ni Atud a basar iti inisyal nga imbestigasyon, naggapo iti master bedroom ti uram gapu iti naibati a naisaksak a cellphone.
Inbatad na a gapu iti kapigsa ken alisto a panagramram ti apoy ket awan ti appliances wenno napapateg a gamit a naisalbar ti pamilya.
Kabayatanna, inpakaammo na nga awan dagiti nadangran gapu ta pimmanaw amin dagiti agnanaed idi napasamak ti uram.
Kuna ni Atud nga iti agdama ket agtultuloy ti imbestigasyon iti napasamak.
