LAOAG CITY – Nailungalong ti agarup 1.4 bilyon a pisos nga annual budget ti lokal a gobierno ditoy siudad ti Laoag para inton 2026.
Segun ken ni Mayor James Bryan Alcid, masapul nga adalen ken tingitingen a naimbag dagiti Department Heads manipud kadagiti nagduduma nga opisina iti lokal a gobierno ti bukud dagitoy a pundo.
Inbatadna a babaen iti daytoy ket maammoan no ania dagiti maipangpangruna a programa ken proyekto a maiyalokaran ti pundo para iti sumaruno a tawen.
Inlawlawagna nga adda ti pannakisarita ken pannakikoordinarna kadagiti mangidadaulo kadagiti amin nga opisina ti City Government para iti napinpintas a pannakailatang ti pundo.
Kunana a ti nasao a nailungalong a pundo ket karaman ditoy ti sueldo dagiti amin nga empleado ken dadduma pay.
Innayonna nga agbirbirukda kadagiti kukua ti lokal a gobierno a mabalin nga agbalin nga income generating.
