LAOAG CITY – Dumanon iti agarup maysa a bilyon a pisos ti balor iti nadadael iti iduduprak ti Bagyo Julian ditoy Ilocos Norte.
Segun ken ni Gov. Matthew Marcos Manotoc, basar iti Provincial Damage Report gubuay iti Bagyo Julian, adda ti nasurok 600 a milyon a pisos a balor iti nadadael iti benneg ti imprastraktura idinto a dumanon iti nasurok 350 a milyon a pisos ti nadadael iti benneg iti agrikultura.
Mainaig iti daytoy, indauloan ni Presidente Ferdinand Bongbong Marcos Jr. ti pannakaibunong ti 799 a food packs para kadagiti residente manipud kadagiti nagduduma a barangay ditoy siudad ti Laoag a nakaro a naapektaran iti iduduprak ti Bagyo Julian.
Agbalor ti tallo a ribu a pisos iti tunggal maysa a food pack no sadinno nga adda ti pakabuklan a 2,397,000 a pisos.
Kadua ni Pres. Marcos a bimmisita ditoy probinsia da Department of Social Welfare and Development Sec. Rex Gatchalian, Department of the Interior and Local Government Sec. Benhur Abalos Jr., Department of Public Works and Highways Sec. Manuel Bonoan, Department of Agriculture Sec. Francisco Tiu Laurel Jr. ken Chief of Staff of the Armed Forces of the Philippines Gen. Romeo Brawner Jr.
Mainaig iti daytoy, personal a napan kinita ni Pres. Marcos ti dike a nadadael iti Brgy. Gabu Sur ditoy siudad ti Laoag gapu iti epekto ti Bagyo Julian.
Inlawlawagna a nasken a masapol a masukatan ti diseniona ken maiplastar a naimbag ti slope protection tapno natibtibker ken saan a dagus a madadael iti kanito nga adda ti didigra a sumangbay.
Naammoan a basar iti datos, adda ti 127,283 nga indibidual ti naapektaran gapu iti Bagyo Julian, 34,859 a pamilia, 369 a barangay, 2, 276 ti nagibakwit, walo a pagtaengan ti totally damaged ken 296 ti partially damaged.
Kabayatanna, nangipaay ti Office of the President ti 100 a milyon a pisos kas financial assistance para iti Provincial Government of Ilocos Norte.
