LAOAG CITY – Agarup maysa a milyon a pisos ti napastrek dagiti Micro Small and Medium Enterprises wenno MSME’s ken dagiti mannalon a nakipaset iti Producer to Consumer program itay napalabas a bulan ti Abril.
Imbatad ni Mrs. Elma Gabriel, mangidadaulo ti MSME Office ti gobierno probinsial a ti nasao a kantidad ti nagtipon a napatrek iti Quezon City ken San Juan City.
Mainaig iti daytoy, kuna na a mabalin a manayunan pay dagiti siudad idiay Metro Manila a pakaitampokan dagiti lako ti probinsya kadagiti sumarsaruno a bulan.
Gapu iti daytoy, nagpanawagan ni Gabriel kadagiti dadduma pay a Micro Small and Medium Enterprises ken mannalon nga interesado a makipaset iti Producer to Consumer program ken agturong laeng iti opisinada.
Ginutigotna dagitoy a mapan agaplikar tapno mairamanda iti nasao nga aktibidad ti gobierno probinsial.
Inlawlawagna a mangitugot laeng dagiti mannalon iti valid ID ken makipagkameng iti nabukel a kooperatiba iti babaen ti MSME Office tapno mabalin dagitoy ti makipaset iti Producer to Consumer program.
Immuna iti daytoy, kuna ni Gabriel a kalikagum ni Gob. Matthew Marcos Manotoc a mapaadu pay dagiti pakaisayangkatan ti nadakamat a programa ti probinsia tapno ad-adu a Micro Small and Medium Enterprises ken mannalon ti maakomodar a makipartisipar iti Producer to Consumer program.
