LAOAG CITY – Nadungpar dagiti agasawa a baket ken lakay iti maysa a van iti paset ti Brgy. 21 Libtong iti ili a Bacarra.
Nabigbig dagiti biktima a da Buenaventura Cacal y Rivera, 78 ken Lolita Cacal y Estoque, 72, residente iti nasao a barangay idinto a ti driver ti van a nakadungpar kadakuada ket ni Jerome Abonal y Bitonio, 50, naasawaan, ken residente iti B17 L16 Duraville Homes II Ampid San Mateo, Rizal.
Basar iti imbestigasyon ti PNP Bacarra, bayat nga apadpadaya a direksyon ti nasao a van iti national highway idinto nga agballasiw iti pedestrian dagiti agasawa a naggapo a nagpacheck-up iti Bacarra Medical Center ket ditoy a kellaat a nadungpar dagitoy.
Gapu iti daytoy, insigida a naitaray dagiti biktima iti Bacarra Medical Center ken naiyakar dagitoy iti Gov. Roque B. Ablan Sr. Memorial Hospital para iti naan-anay a pannakataming da ngem naiyakar met laeng dagitoy iti Mariano Marcos Memorial Hospital and Medical Center iti ciudad ti Batac.
Iti agdama, nagtalinaed met nga awanan poot ti lakay a Cacal.
Kabayatanna, nagnegatibo met iti liquor test ti driver ti van ken agdama a naipakustodyar iti PNP Bacarra.
