LAOAG CITY – Kinumpirmaran ni Atty. Cornelio Samaniego III, pannakangiwat ken abugado ti agasawa a Curlee ken Cezarah “Sarah” Discaya a nag-“tell all” dagitoyen wenno inbutaktakdan ti amin nga ammoda iti Independent Commission for Infrastructure (ICI) ken iti Justice Department.
Inbatad ni Samaniego nga innaganan metten dagiti klientena dagiti amin a personalidad a karaman iti maanomalya a flood control projects.
Kunana a 17 a personalidad ti dinakamat ti agasawa iti affidavit-da ken agisubmitirda pay ti supplemental affidavit.
Inlawlawagna nga iti supplemental affidavit, ikabilda dagiti nagan dagiti dadduma pay a karaman iti maanomalya a saanda a nadakamat iti panagdengngeg ti Kamara ken Senado.
Iti agdama, addan iti protective custody ti Department of Justice ti agasawa a Discaya.
Inpakaammo ni Samaniego nga awan ti isublida a luxury vehicles kalpasan a na-freeze ti bank accounts dagiti Discaya.
Innayonna nga inpetteng ti agasawa a Discaya nga ibutaktak ti amin nangruna ket makaaw-awatda ti pangta iti biag.
