LAOAG CITY – Maminsan manen a mapaayaban ti agasawa a contractor nga isuda Pacifico ken Cezarah Discaya iti panagdengngeg ti Senate Blue Ribbon Committee inton Septiembre 18 mainaig iti maanomalya a flood control projects.
Inbatad ni Senate Blue Ribbon Committee Chairman Panfilo Lacson a sumango manen ti agasawa a Discaya tapno lawlawagen ti saan nga agpada a testimoniada iti Senado ken Kamara.
Kalikagum a tingitingen ti Senador no agibagbaga ti sibubukel wenno kagudua laeng ti kinapudno ti dakdakamaten ti agasawa a Discaya.
Malaksid kadakuada, naimbitaran manen ni Department of Public Works and Highways (DPWH) Undersecretary Maria Catalina Cabral tapno komprontaen mainaig iti pananglibakna nga inallukoyna ni Senate President Tito Sotto III a mangiserreken ita a nasapa pay kadagiti insertions iti 2026 national budget.
Saan met a nakalisi iti Blue Ribbon ti lima a maibilang a BGC Boys o Bulacan Group of Contractors a pakairamanan da dati a Bulacan District Engineer Henry Alcantara ken dati a Bulacan Assistant District Engineer Brice Hernandez.
Immunan nga inrakurak ni Lacson a gagemna nga imbitaran iti panagdengngeg ti contractor a ni Mina a maipagarup a kasarsarita ti tauhan ti maysa a senador para kadagiti komision iti flood control projects.
