LAOAG CITY – Saanen a makikooperar iti imbestigasion ti Independent Commission for Infrastructure (ICI) ti agasawa a Sarah ken Curlee Discaya.
Inrakurak daytoy ni Independent Commission for Infrastructure Executive Director Atty. Brian Keith Hosaka iti maysa a press conference.
Inbatad ni Hosaka, inusar ti agasawa a Discaya ti karebbengan a saan nga agsarita kontra iti bagida.
Inpettengda a saandan a makitinnulong iti aniaman nga addang ti komision.
Ti imbestigasion ket adda ti pakainaiganna kadagiti alegasion a maanomalya a proyekto ti imprastruktura.
Gapu iti daytoy, posible a maitantan ti panagdur-as dagiti kaso a naipila kontra kadakuada.
Agtultuloy met ti panangtingiting ti Independent Commission for Infrastructure tapno maala ti kasapulan nga ebidensia manipud kadagiti dadduma a karaman iti kaso.
