LAOAG CITY – Pimmusay dagiti agasawa iti ili ti Pagudpud kalpasan ti pannakaidungpar ti nagluganan da a kurong-kurong iti maysa a ten wheeler truck a nakaparking iti igid ti kalsada a paset ti Brgy. Balaoi iti nasao nga ili.
Nabigbig dagiti biktima a ni Eugene Corpuz y Abian, agtawen ti 61 ken ti assawa na a ni Adela Corpuz y Saladino, agpada a residente iti Brgy. Pasaleng iti nasao nga ili.
Segun ken ni Pol. Staff Sgt. Edmar Yadao iti PNP-Pagudpud ken imbestigador iti nasao nga insidente, agpaamian ti kurong-kurong idi ta kellaat a nasapgud na ti nakaparking ten wheeler truck.
Gapu iti napigsa nga impact, nagbaliktad ti kurong-kurong nga isu ti nangitunda ti pannakaipurwak ken panagsagaba ti sugat iti nagduduma a paset ti bagi dagiti agasawa.
Dagus a naitaray dagiti biktima iti Bangui District Hospital ngem agpada a naideklara dagitoy a dead on arrival.
Naamoan a ti nakaparking a ten wheeler truck ket naperdian ngem awanan ti aniaman a warning device.
Kabayatanna, kuna ni Yadao nga adda ti immunan a panagtalimpuagaw ti driver ti truck ngem boluntaryo met laeng a simmuko kadagiti otoridad itay bigat.
Inpakaammo ni Yadao a nagkiddaw ti tulong ti pamilya dagiti biktima iti driver ken manamnama nga agsasarita dagitoy ita nga aldaw.
