LAOAG CITY – Napalaos ti luksaw ni Bombo International News Vilma Mcdaniel idiay North Carolina kalpasan a naabak ni President Donald Trump.
Inadmitir na nga agpapan ita ket saan na a maakseptar a naabak ni Trump kontra kenni President-elect Joe Biden gapo ta ammo na nga adda ti napasamak a panagswitik.
Segun kenni Mcdaniel, nangabak laeng ni Biden gapo ta maipagarop a nagswitik daytoy iti eleksyon.
Inlawlawag na nga idi saan pay a simmangpet dagiti mail-in votes ket lamang pay laeng ni Trump ngem idi addan dagitoy ket kellaat lattan a bimmaba ti butos na.
Direkta pay nga inakusaran ni Mcdaniel dagiti watchers idiay Michigan State a saan da a patas ken maipagarop a ti binilbilang da a mail-in votes ket peke.
Inpetteng na a saan a nakapapati a dagiti mail-in votes ket arig na butos amin ni Biden.
Kunana pay a gapo ta ni Biden ti nangabak ket namnamaen da a ma-lockdown manen ti Estados Unidos, maingato ti pagbayad ti buwis ngem saan met nga agbaliw ti sweldo, ken ekspektaren da a gumato pay ti presyo ti gasolina.
Mainaig iti daytoy, inpeksa pay ni asawa ni Mcdaniel a ni Bryan Mcdaniel ti pannakadismaya na iti eleksyon ken sigurado a nakarkaro a nagulo ti Amerika.
Kuna pay ni Mr. Mcdaniel nga iti impormasyon na ket mangala ni Trumo ti rinibo nga abogado tapno agimbestigar iti maipagarop a panagswitik.
