LAOAG CITY – Kinumpirmaran ti saan a nagpabigbig nga abogado iti Iligan City nga adda iti innem a pamilya manipod idiay Marawi City a temporaryo nga agnanaed iti balay da.
Iti ekslusibo nga interview iti Bombo Radyo iti nasao nga abogado, inbatad na a malaksid kadagiti adda iti balay da ket tumultulong da pay kadagiti evacuees.
Kuna na nga aramiden da amin iti asawa na a maysa a doctora ti kabaelan da tapno matulungan da dagiti maseknan.
Inpetteng na a saan da a mabalin a baybay-an dagitoy gapu ta ad-adda laeng nga agbalin da a nakakaasi no awan ti tumulong kadakuada.
Inpakaammo na nga uray iti garahe da ket napunnon gapu ti kaado dagiti temporaryo nga agnanaed ti balay da.
Innayon na a palubusan da laeng nga agawid dagiti maseknan idiay Marawi City no agparbengen ti mapaspasamak a riribok iti nasao a lugar.
Mainaig iti daytoy, immapela iti publiko ti nasao nga abogado a tumulong da kadagiti apektado ti riribok idiay Marawi City.
Kabayatanna, nakasagana dagiti papagayam ti nasao nga abogado ditoy Ilocos Norte a mangipaay ti tulong kadagiti evacuees idiay Marawi City.
