LAOAG CITY – Inlawlawag dagiti saanen a nagpabigbig nga agassawa ditoy siudad ti Laoag ti nagbalin a kapadasanda kalpasan a biktima dagitoy ti investment scam.
Segun kadagiti agassawa, maysa nga asawa ti kapitan ti barko iti Brgy. 28 ditoy siudad ti Laoag ti nangidiaya ti investment kadagitoy.
Kuna ti babai a biktima a bayat ti panangallukoy ti suspek kadakuada tapno ag-invest, inlawlawag daytoy a makaawat da ti pensyon iti tunggal lawas wenno agingga iti kada bulan.
Gapu iti daytoy, kuna ti biktima a babai a nagtalek da iti suspek agsipod ta adda metten dagiti am-ammo da a nakapadas ti nasao nga investment.
Inpakaammo na nga idi Hunyo 28, nangited ti 500 a ribo a pisos ken maysa a milyon a pisos ti inted ti assawa na.
Kuna na a simmaruno a nangted ti maysa a milyon a pisos idi Hunyo 30, 2.5 milyon a pisos idi Hulyo 1 ken dua a milyon a pisos idi Hulyo 5.
Nu pay kasta, agpapan ita ket awan pay a pulos ti naaw-awat a pensyon nga agassawa manipod iti investment nga indiaya ti suspek.
Immuna iti daytoy, kuna ni Agent Hilario Manding, ti mangidadailo iti National Bureau of Investigastion (NBI) ditoy siudad ti Laoag a lehitimo ti AMUSOP investment a sinerrek dagiti agassawa.
Nu pay kasta, maimbestigaran daytoy kangrunaan ti suspek a binigbig na a ni Fatima Datup Mangusan gapu ta umaboten iti nasurok 100 a milyon a pisos ti naala na manipod kadagiti biktima na sipud tay napan a tawen.
Mainaig iti daytoy, inpakaammo ni Brgy. Chairman Elmer Siazon iti Brgy. 28 a naruay ti agturturong iti opisina na tapno agreklamo iti ar-aramiden nga scam ti supek.
