LAOAG CITY – Inpakaammo ni Barangay Chairman Bang Rarangol iti Brgy. Nagpatpatan iti ili ti Solsona nga adda ti agassawa a maipagarup a naglibas ken nagturong da ti Pangasinan nupay manarimaan a naka-home quarantine da.
Kuna ni Rarangol a lima wenno innem pay laeng nga aldaw a naka-home quarantine dagiti maseknan ket maipagarup a nagturong da iti nasao a probinsya idi saan pay a naipatungpal ti lockdown.
Segun kenkuana, sakbay iti daytoy ket maipagarup a nagturturong da iti nagduduma a lugar para iti negosyo da.
Inbatad ni Rarangol nga uppaten nga aldaw naistranded dagiti agassawa ili ti Badoc idi nagsubli da kalpasan naipatungpal ti total lockdown.
Innayon na nga awan ti mabalinan na no saan a kayat ti lokal a gobyerno a sukunen dagiti agassawa a naistraded iti ili ti Badoc gapu iti maipagarup a panaglibas da bayat a naka-home quarantine dagitoy.
Iti mainaig a damag, inlawlawag ni Mrs. Glenda Sahagun, residente iti Brgy. Nagpatpatan iti ili ti Solsona no apay a maipagarup a naglibas da a nagturong iti probinsya ti Pangasinan.
Kuna na a simmangpet da iti asawa na manipud iti nasao a probinsya idi Marso 16 ken idi Marso 17 ket nagturong dagiti barangay health workers iti pagtaengan da.
Inbatad ni Sahagun a naginterview dagiti BHW kadakuada ken inalaan da iti temperatura.
Segun kenni Sahagun, ammo dagiti BHW a napan da iti Pangasinan tapno kitaenna ti ama na kalpasan a nadesgrasya ken nadait iti baba ti mata na.
Inbatad na nga idi rimwar da iti Ilocos Norte ket naalaan da laeng ti temperatura ken nasaludsod ti pagturongan da a lugar ngem awan ti inpakpakita da nga anyaman a dukomento a pammalubos nga agbiyahe da.
Naglikudan na a nagturong da iti nagduduma a lugar.
Naklaat da lattan iti panagsubli da ditoy Ilocos Norte idi Marso 30 gapu ta naipatungpalen ti lockdown.
Inpetteng ni Sahagun a saan da a napakaammuan a maibilang da Person Under Monitoring gapu ta awan ti gurigor da wenno anyaman a sintomas ti coronavirus.
Kuna na nga inpakaammo kuma dagiti maseknan kadakuada a under monitoring da nga agassawa.
Kamaudian na, inpetteng ni Mayor Joseph de Lara a nagsalungasing dagiti agassawa iti pagalagadan gapu ta isuda ket maibilang a person under monitoring.
Kuna na nga uray iti probinsya ti Pangasinan ket mamonmonitor da.
Segun kenni de Lara, kinasaritana dagiti opisyal ti barangay mainaig iti isusubli da iti ili da ngem maipagarup a saan da a kayat.
Inbatad na a kayat na nga alaen isuda ngem saan a kayat ti kapitan.
Kiniddaw ni de Lara ti publiko iti panangrespeto dagiti ipatpatungpal ti lokal a gobyerno ti Solsona ken masapul a makisarita wenno agpakada da kadagiti maseknan.
Innayon na nga aganus da a madisinfect no agawid dagiti maseknan iti ili da.
