LAOAG CITY – Nakita ti agatiddog ti 3.1 a metro a beklat iti maysa a mall iti ili ti San Nicolas.
Segun ken ni Fire Senior Inspector Edison Reyes iti Municipal Fire Marshal iti ili ti San Nicolas, timmawag dagiti staff ti mall gapu ta adda nakita da nga uleg iti maikadwa a kadsaaran ti parking area.
Insigida da a nagresponde ken ditoy a nakita da ti uleg nga adda iti rabaw ti maysa a lugan.
Kunana nga idi ginammatan da ti uleg ket ditoy a simmirok iti maysa a motorsiklo ngem sumagmamano nga oras ket ditoy a natiliw da met laeng.
Nu pay kasta inbatadna nga awan ti gita ti nasao nga uleg.
Iti agdama, nagtalinaed ti uleg iti Municipal Fire station iti nasao nga ili ken manamnama a maiturn-over iti biang ti Municipal Environment and Natural Resources Office (MENRO).
Kabayatanna, daytoy ti maikadwa a gundaway nga adda napasamak a kastoy nga insidente iti nasao a mall.
