LAOAG CITY – Agpada a pimmusay dagiti agayan-ayat kalpasan ti napasamak a desgrasya iti paset ti Brgy. Bil-loca iti siudad ti Batac.
Binigbig ni PMaj. Dionisio Baldillo, ti deputy chief of police ti PNP iti nasao a siudad dagiti biktima nga isuda Lord Belman Reyes, agtawen ti 26 ken ti nobya na a ni Henna Lorie Rosario, agpada a residente iti San Juan, Ilocos Sur.
Inbatad na a basar iti naiyuswat nga imbestigasyon, agpapaamianan dagiti biktima a naglugan iti motorsiklo.
Kuna na a bayat ti panagbiyahe dagitoy ket natennag ti bag a nakaparabaw iti sango ti motorsiklo ken dita a napukawan ti kontrol iti manibela ti driver.
Gapu iti daytoy, inpakaammo ni Baldillo a na-slide ti motorsiklo ken agpada a naitupar iti kalsada dagiti agayan-ayat.
Inbatad na a nakana a sugat iti ulo ti sinagaba dagiti biktima nga isu ti met ti rason ti dagus a pannakatay da.
Inpakaammo ni Baldillo nga umay koma agtrabaho ti lalaki ditoy probinsya ken intugot na ti nobya na.
Kabayatanna, rumrumuar a napaspas ti taray ti motorsiklo idi napasamak ti desgrasya.
