LAOAG CITY – Balligi ti pannakatiliw dagiti agayan-ayat babaen iti naiyuswat a drug buy bust operation iti Barangay Dariwdiw iti ciudad ti Batac.
Nabigbig dagitoy nga isuda Emerson Sanguir y Galang, agtawen ti 39, drug surenderer, maysa a security guard ken residente iti Barangay 27, Batac ken ti live in partner na a ni Melisa Libed y Decano, agtawen ti 40, residente iti Barangay 34, Dariwdiw iti nasao a ciudad.
Segun kenni Police Staff Sergeant Carlo Carlos, OIC team leader ti Regional Drug Enforcement Unit (RDEU), nakumpiskar iti operasyon da ti maysa a sachet ti maipagarop nga iligal a droga nga agdagsen ti 1.2 grams ken agbalor ti 10 ribo a pisos.
Kunana a naitudo ni Sanguir nga isu ti paggapgapoan ti maipagarop nga iligal a droga basar kadagiti ummunan a natiliw.
Inlawlawag na a bayat a nakaduty ni Sanguir ket dumanon ti gumatang kenkuana ken no dadduma ket no agawiden manipud iti pagtrabahoan na.
Mainaig iti daytoy, kuna ni Carlos nga agsupsuplay ti iligal a droga ni Sanguir iti ciudad ti Batac ken kabangibang nga ili.
Kunana a karaman ni Sanguir iti maysa a drug group.
Iti agdama ket temporaryo a nakabalod ti PNP-Currimao dagiti agayan-ayat ken maisagsagana dagiti dokumento para iti pannakaipila ti kaso a panaglabsing iti Section 5 iti RA 9165.
