LAOAG CITY – Natay dagiti agayan-ayat kalpasan a nadesgrasya da iti kurbaan a paset ti bypass road iti Brgy. Vira ditoy siudad ti Laoag.
Iti impormasyon a nakalap ti Bombo Radyo Laoag, nakalugan dagiti agayan-ayat iti yamaha nmax a nagmaris iti berde.
Nabigbig dagiti biktima a ti lalaki ket agtawen ti 24, awanan asawa, ken residente iti Brgy. 19 ditoy siudad idinto ti babai ket agtawen ti 19, ken residente iti Brgy. Barit ditoy siudad.
Segun kenni Police Corporal Alexson Rosal iti PNP traffic division, nakaawat da ti report itay agarup alas-dos kuarenta nga adda ti napasamak a desgrasya iti nasao a lugar.
Kuna na a naipurwak dagiti nakalugan manipud iti nagluganan da a motorsiklo.
Rumrumwar a natukkol ti tenged dagiti dua.
Naitaray dagiti maseknan iti ospital ngem naideklara a dead on arrival dagitoy.
Maipagarup a naggapu dagiti agayan-ayat iti maysa a pagiinoman ket possible a mapan da sumakada iti inumen da gapu ta adda ti maysa a case ti serbesa iti lugar a nakadesgrasyaan da.
Naamuan a naaksidente dagitoy iti abagatan a paset ti nakadesgrasyaan ni sigud a Bise Mayor Michael Fariñas.
