LAOAG CITY – Nakimat ti maysa a nuang iti Brgy. Bato iti ili ti Badoc.
Segun ken ni Mr. Godfrey Luna, akinkukua ti nasao a nuang, apaman a naiyaponna ti tarakenna ket saan a nagbayag ket nakimat metten ti dingwenna kagiddan ti napigsa a tudo ken gurruod.
Inbatadna a naammoanna ti napasamak kalpasan nga inbaga dagiti kaarrubana kenkuana a nakimat ti tarakenna a nuang.
Inlawlawagna a nupay nakimat ti tarakenna ket dakkel latta ti panagyamanna iti Dios gapu ta saan daytoy a nairamraman iti insidente.
Kunana a daytoy met ti umuna a gundaway nga adda ti nakimat a dingwen iti bukudda a lugar.
Innayonna nga agbalor iti sumurok-kumurang 60 a ribu a pisos ti tarakenna a nuang ngem nailako laeng iti 20 a ribu a pisos gapu iti pannakakimatna.
