LAOAG CITY – Naarestar dagiti tallo a lallaki iti naiyuswat nga anti illegal drug buy bust operation iti Sitio Nagcalaoan, Brgy. 17, Tabug iti siudad ti Batac.
Nabigbig dagiti suspek a da Michael Bul-lalayao y Macadeng alyas “PUNAR”, agtawen 36, naasawaan, self employed ken residente iti Brgy 17, Tabug iti nasao a siudad; Austin Marlou Calacal y Dumlao, agtawen 22, baro, awan ti trabaho, residente iti Brgy Bil-loca Batac, kenni Hassandor Lumna y Renebor, agtawen 34, naasawaan, negosyante, ken residente iti Brgy Dancel iti ili ti Dingras.
Naglako dagiti suspek ti dua nga small-sized heat sealed transparent sachet a naglaon ti maipagarop a shabu nga agbalor ti 2 ribo a pisos iti maysa a pulis a nagserbi kas poseur buyer.
Malaksid iti daytoy, narekobre pay dagiti otoridad iti ikot ni Bul-lalayo ti dua a dadakkel nga heat-sealed transparent plastic sachets a naglaon ti maipagarop a shabu idinto a naala met kenni Lumna ti 2 dua a babassit nga heat sealed transparent plastic sachet a naglaon ti maipagarop a shabu, drug paraphernalia, improvised glass tube tooters, 60 a pisos, maysa a cellphone ken maysa pay a dakkel a plastic sachet a shabu.
Naamoan nga agdagsen ti 26.08 a gramo ti innem a nakumpiskar a maipagarop a shabu a mapatta-patta nga agbalor ti 260,800 a pisos.
Naamoan a karaman da Bul-lalayao kenni Lumna iti drug watchlist ti Ilocos Norte Police Provincial Office (INPPO).
