LAOAG CITY – Inadmitir iti Bombo Radyo Laoag ni Mrs. Lilian Reslin, OIC iti General Services Office (GSO) nga addda ti pinirmaan na nga agarop a 30 ribo a pisos a balor ti agas a saan pay a naideliver.
Daytoy ket gapu ta agamak ti supplier nga ag-expired dagiti agas gapu ta saan pay a maus-usar ti ICU iti Laoag City General Hospital (LCGH) isut gapuna a saanda paylaeng nga indeliver.
Nupay kasta, iti biang ni Vice Mayor Vicentito Lazo ket saan laeng a 30 ribo a pisos ti balor dagiti agas a saan pay a naideliver no di ket nasurok a 100 a ribo a pisos manipod iti nasurok a 1-milyon a balor ti agas a nagatang a para iti LCGH.
Inpetteng ni Lazo nga uray 30 ribo a pisos wenno 100 a pisos laeng ti balor ti agas a saan a naideliver ket maibilang latta a ghost delivery wenno illegal ken irregular.
Inpalgak na a ti usto a proseso ket bayadan laeng ti gatangen nga agas no naideliver aminen ti supplier.
Innayon na nga iti procurement ti gobierno ket awan ti makunkuna nga advance payment.
Kuna pay ni Lazo a saan a makaumanay ti palawag ti supplier a saan da pay nga indeliver dagiti agas a para iti ICU iti nasao nga ospital gapu ta amangan no ag-expired.
Inkalintegan ti bise mayor a ti koma naaramid ket saan da a nangala ti agas a para iti ICU gapu ta saan pay a mausar ken no ania laeng dagiti naideliver ket isu ti nabayadan tapno awan ti illegal a napasamak.
