LAOAG CITY – Agdagup iti 777 a ribu a pisos ti balor ti donasyon ti China a bagas ken naruay a de lata para iti Ilocos Norte.
Daytoy ket kalpasan a nagsurat ni Gob. Imee Marcos ken ni Chinese Consul Wang Jiangqun gapu iti nakana a namsaakan ti bagyo ompong ditoy probinsia.
Segun ken ni Mr. Edwin Cariño, mangidadaulo ti Sustainable Development Center wenno SDC, nakaal-alisto ti China a nagresponde nupay uray ti pagilian da ket nagpasar met iti nakana a namsaakan ti bagyo ompong.
Impannakkel na a napintas a klase na a sangapulo a tonelada a bagas nga agbalor ti 480 ribu a pisos ken uppat a klase a naruay a de lata nga agbalor ti 297 a ribu a pisos.
Inlawlawagna a kinaykayat ti China ti gimmatang kadagiti nasao a produkto imbes a kuarta ti maited tapno adda ti madagdagus a tulong a maipaay kadagiti umili ditoy probinsia.
Mainaig iti daytoy, impasingked ni Carino nga agtultuloy ti pannakaipaay ti “food pack” kadagiti lugar a pakaisaysayangkatan ti “relief operation”.
Innayonna a kalikagum ti gobernador nga agingga nga adda dagiti maawat ti probinsia a donasyon ket agtultuloy met ti panagturong kadagiti nadumaduma a barbarangay ditoy probinsia para iti pannakaipaay ti tulong kadakuada.
