LAOAG CITY – Nangiruar ti video ti Malacañang a mangipakpakita ti kasasaad ni Presidente Ferdinand Marcos Jr., iti baet kadagiti agwarwaras a saan nga husto nga impormasion mainaig iti salun-atna.
Iti nasao a video, makita ti Presidente kabayatan a makiay-ayam iti asona nga Oreo.
Segun iti Presidente, nasayaaten ti kaririknana ken in-inoten a makatrabaho.
Inyangaw pay ti Presidente, natagtagainepna a mangmangan isuna ti steak gapu ta digo laeng ti mabalinna a kanen iti uneg ti tallo nga aldaw tapno makainana ti bagisna.
Pinaneknekan ti Presidente iti babaen ni Usec. Claire Castro a saan nga Artificial Intelligence ti video daytoy.
Kabayatanna, kinondenar met ti Presidential Communications Office (PCO) ti panagwaras dagiti peke a dokumento kontra iti Presidente a saan a naggapu iti aniaman a lehitimo a panangtingiting.
Nagballaag ti Palasyo nga ad-adalenen ti posible a legal nga addang kontra kadagiti panagwaras ti peke a damag.
