LAOAG CITY – Natiliwen dagiti agga-ama a nangdangran kenni Jessie Dela Cruz iti mismo a balay da idiay Barangay Catangraran iti ili ti Solsona.
Segun kenni Police Senior Inspector Chris Anthony Sorsano, chief of police ti PNP-Solsona, napilaanen ti kaso a frustrated murder dagiti nasao a suspek.
Segun kenni Sorsano, ti ummuna a plano ti pamilya ti biktima ket agsasarita da laeng iti barangay gapo ta agkakagbagyan da ngem gapo ta nakita da a kumarkaro ti sitwasyon ni Dela Cruz ket nagdesisyon da a pilaan ti kaso.
Kunana a gapo iti daytoy ket dagus a tiniliw dagiti otoridad dagiti suspek a da Jimmy dela Cruz, kabsat ti biktima ket dagiti annak na a da Michael ken Joseph.
Inbatad na nga iti panagmonitor da iti biktima ket adda iti kritikal a kondisyon ngem mangnamnama a makalasat daytoy.
Maipalagip a binakal da Jimmy ken Michael ti biktima ket idi natulid ken pinang-ur ni Joseph daytoy kalpasan ti nabara a panagsinnungbat dagiti agkabsat.
