LAOAG CITY – Agpada a pimmusay kalpasan a napaltu-paltogan dagiti agikit iti ili ti Pagudpud.
Inpakaammo ni PMaj. Jomar Andres, hepe ti PNP-Pagudpud, agpada a dead on the spot dagiti agikit a ni Lea Balulong, agtawen ti 39 ken ni John Kurt Daguro, agtawen ti innem ken agpada a residente iti Proper Dos Brgy. Subec, Pagudpud.
Inbatad na a basar iti inisyal a panagibestigar da, magmagna dagiti agikiti iti igid ti kalsada ken agturong da iti tiangge idi ta kellaat a pinaltu-paltogan dagiti riding in tandem suspects a naglugan iti nangisit nga honda TMX ken nakasuot dagitoy ti helmet.
Kuna na a dagus a nagtalimpuagaw dagiti suspek kalpasan ti pammaltog ken nagturong dagitoy iti saan a masinunuo a direksyon.
Iti agdama ket manarimaan ti pannakaiyuswat ti naun-uneg nga imbestigasyon iti nasao a pammaltog tapno maamoan ti pakabigbigan dagiti suspek ken motibo iti krimen.
Innayun ti hepe a kitkitaen metten ti kapulisan dagiti posible a nakaimuntar a cctv iti asideg ti nakapasamakan ti krimen.
