LAOAG CITY – Kinumpirmaran ni Mayor Cresente Garcia iti ili ti Burgos ti pannakatakaw dagiti sanikua dagiti agina a turista iti nagiyanan da nga hotel iti nasao nga ili itay kallabes.
Immuna iti daytoy, inbilin na iti hepe ti PNP Burgos a kitaen da dagiti CCTV camera ken paimbitaran da dagiti empleyado ti Palalay Hotel kangrunaan dagiti nalpas ti duty na idi napasamak ti panagtatakaw.
Ibilang ni Garcia nga ammo dagiti saan a nabigbig a suspek ti inar-aramid da.
Segun iti mayor, ammo dagiti suspek ti tinurong da a kuarto a nagiyanan dagiti agina a turista a naggapu iti Metro Manila.
Rumrumwar a maipagarup a awan ti napwersar a nagserkan dagiti mannanakaw.
Mainaig iti daytoy, nasakit ti nakem dagiti biktima kalpasan a naitaray dagiti mannakaw ti bag a naglaon ti alahas, 20 a ribo a pisos a kuarta, dua a cellphone ken dadduma pay.
Inkiddaw na iti management ti hotel a makitinnulong da tapno masolbar ti kaso gapu ta saan laeng nga isuda ti maperdi ngem ketdi ti rupa ti ili ti Burgos a maibilang a natalged ken tourist destinastion.
Iti mainaig a damag, inlawlawag ni Mayor Cresente Garcia iti ili ti Burgos a napasamak ti pannagtatakaw iti Palalay Hotel idi Martes ti rabii kalpasan a nakasangpet dagiti biktima manipud iti biyahe.
Kuna na nga umabot ti 17 dagiti turista ken nagsisina da ti kuarto idi napasamak ti panagtatakaw idinto a natakaw ti sanikua dagiti agina a turista.
Segun kenni Garcia, pannakapwersa a nalukatan dagiti ridaw wenno ti tawa ti kuarto ti kitkitaen da nga anggulo ti insidente.
Inbatad na nga awan met ti nailasin dagiti biktima kadagiti suspek.
Inbunannag ni Garcia a mapaayaban manen dagiti empleyado ti hotel kangrunaan kadagiti nalpas ti trabaho na iti kanito a natakawanen dagiti biktima.
Iti agdama, agtultuloy paylaeng ti naun-uneg nga imbestigasyon dagiti kameng ti PNP Burgos en nakaawiden dagiti biktima kalpasan ti insidente.
