LAOAG CITY – Nadesgrasia dagiti agina a nakalugan ti motorsiklo iti paset ti Brgy. 31, Talingaan ditoy Siudad ti Laoag.
Binigbig ni PCpl. Artemio Magaoay Jr., ti Duty Desk Officer ti Philippine National Police Laoag Traffic Division dagiti agina nga isuda Myrna ken Ralph Jason Felix idinto a ti agtagikua ti baka ket ni Ernesto Domingo, agpapada a residente iti nasao a Barangay.
Inbatad ni Magaoay Jr. a basar iti naisayangkat nga imbestigasion, bayat a dumaldalyasat dagiti agina a nakamotorsiklo ken agpapalaud ket dita a kellaat a bimmallasiw ti maysa a baka a nangitunda ti pannakadesgrasia dagitoy.
Inlawlawagna nga aksidente a naibbatan ti apoko ti akinkukua ti baka ti tali ti nasao a dingwen rason a naparuk-atan na.
Gapu iti daytoy, kuna ni Magaoay Jr. a nagsagaba ti sugat iti nagdumaduma a paset ti bagi dagiti agina ken naitaray dagitoy iti Governor Roque Ablan Sr Memorial Hospital ngem nakaruar met laeng a dagus.
Kunana nga awan met ti impluwensiya ti nasanger ti baro a nangiturong ti motorsiklo ngem saan a nakasuot ti helmet dagiti agina idi napasamak ti desgrasia.
Manamnama nga agsarita dagiti agsinnungbangir a partido inton bigat.
