LAOAG CITY – Inbatad ni Police Capt. Joseph Tayaban, ti chief of police iti ili ti Badoc a nabigbig da dagiti agkabsat a nagtakaw ti irik iti paset ti Barangay Morong babaen ti CCTV footage.
Iti eksklusibo nga interview ti Bombo Radyo Laoag ken ni Tayaban, inbaga na nga idi Oktubre 12 ket adda ti napan nagreport iti opisina da a napukawan ti 11 a sako nga irik.
Inbaga na a nangiyuswat da a dagus ti imbestigasyon agingga a nakadanun da iti paglakoan iti irik iti ili ti Paoay no sadinno a ditoy a naibaga ti agtagikua nga adda iti napan naglako ngem saanna a ginatang gapu ta saan pay a nabilag.
Gapu iti daytoy, inrebisar da ti CCTV Footage ket ditoy a nabigbig da dagiti suspek nga agkabsat no sadinno a ti maysa ket menor de edad idinto a ti maysa ket agtawen ti 23 ken nabigbig iti nagan na a Marlon.
Inlawlawag na nga idi inpakita da ti video ket saanen a nakapaglibak pay dagiti suspek ken inbaga da a napan da inlako dagiti tinakaw da nga irik iti ciudad ti Batac.
Segun ken ni Tayaban, immuna nga inpadas dagiti agkabsat nga ilako dagiti tinakaw da nga irik iti ili ti Paoay ngem saan da a nailako gapu ta saan pay a nabilag, isut gapuna a napan da iti ciudad ti Batac nga isu ti nakailakoan da.
Innayon na a ti inusar dagiti agkabsat a dua a kurung-kurung a nangiluganan da kadagiti tinakaw da nga irik ket binulud da laeng.
Inpakaammo ni Tayaban a possible a naaramid dagiti agkabsat ti nagtakaw ti irik gapu iti nakaro a kinarigat ti panagbiag da.
Kuna na nga awan ti permanente a trabaho dagiti nagannak dagiti suspek ken walo da nga agkakabsat.
Kabayatanna, inbaga ni Tayaban a pursigido ti biktima nga agpila ti reklamo kontra kadagiti agkabsat a suspek.
