LAOAG CITY – Pimmusay ti maysa idinto a nagtalinaed a kritikal iti Mariano Marcos Memorial Hospital and Medical Center ti maysa kadagiti agkabsat a nadesgrasya iti Galpac Bridge, bisinidad ti Barangay San Agustin iti ili ti Paoay.
Segun kenni Police Major Sheryll Guzman, ti chief of police ti Philippine National Police iti li ti Paoay, naglubbon iti motorsiklo dagiti agkabsat a residente dagitoy iti Barangay 20 iti ciudad ti Batac idi napasamak ti insidente.
Basar iti imbestigasyon dagiti otoridad, napaspas ti taray ti motorsiklo bayat nga agpaabagatan ken napukawan iti kontrol ti driver iti manibela idi nadanon da ti agkurba a paset ti rangtay rason ti pannakatulid da ken naipurwak da iti kaadayo a sumagmamano a metro.
Gapo iti daytoy, kuna ni Guzman a gapo ta saan da a nakasuot iti helmet idi napasamak ti desgrasya let nakapasar iti nakana a sugat iti ulo dagiti biktima kalpasan ti panakauyas da iti kalsada.
Dagus met a naitaray iti Mariano Marcos Memorial Hospital and Medical Center iti ciudad ti Batac para iti nakaananay a panakataming da.
Naamoan nga awan pay i driver’s license ti nangiturong ti motorsiklo rason a manamnama a maisyuan ti citation ticket no makaruar iti ospital.
Kabayatanna, dagiti biktima ket naggapo iti Pangil Beach Resort ken agawid da kuman iti ciudad ti Batac idi napasamak ti desgrasya ken positibo a nakainom dagitoy ti nasanger.
